LEGAZPI CITY- Dae pwedesir na matapos an papel kan Philippine National Police (PNP) sa pagpuho kan iligal na droga sa nasyun partikularmente sa drug-clearing operations sa mga barangay.
Sa ibong ini kan paramientras na pagbawal sainda na magsagibo nin mga drug-related operation arog kan buy-bust asin pag-implementar nin search warrant sa mga drug suspects.
Klinaro ni PCI Arthur Gomez, tagapagtaram kan Albay PNP na padagos an saindang pagtabang sa kampanya kontra droga kan gobyerno huli ta dae man nin itinaong probasyon si Presidente Rodrigo Duterte.
Katabang man suboot giraray sinda kan Philippine Drug Enforcement Agency (PDEA) sa mga anti-illegal drugs operation para sa seguridad kan mga agents.
Dugang pa ni Gomez, dae man ninda papabayaan na libreng makagibo nin iligal na aktibidad an mga imbwelto sa droga kun kaya dadakupon an mga ini in kaso maaktuhan sa krimen.
Sa ngunyan, makikipag-olay suboot sinda sa PDEA ngani na aramon kun itatao sa PNP an mga street level o saradit na kaso nin illegal drugs sa probinsya.
Sinabi man kan opisyal na padagos an saindang pag-ako nin mga drug surrenderers asin pag-bariwas nin mga importanteng impormasyon sa mga komunidad dapit sa maraot na epekto kan iligal na droga.
