LEGAZPI CITY — Pighahalat na sana ngonian kan pamilya kan binatilyong si Arjay Llantero, 13-anyos na tulong bes na natudukan nin Dengvaxia dengue vaccine an apod kan Public Attorney’s Office (PAO) katakod kan imbestigasyon sa tunay na rason sa pagkagadan kan saindang aki.
Sa intrevista kan Bombo Radyo Legazpi ki Analyn Llantero, ina kan biktima, nagpromesa sainda an PAO katakod kan pagbisita ni chief Atty. Persida Acosta na aapudan sinda ngani na makapagpasiring sa Quezon City para sa nasambitan na imbestigasyon.
Pagbuyagyag kaini, an ahensya na mismo an masimbag sa gabos na gastos sa pamasahe asin pagkakan ninda sa pagpasiring sa head office kan PAO ngani na maipagpadagos an proseso sa pag-aram kun an itinudok na dengvaxia vaccine talaga an ikinagadan kan binatilyo.
Katakod kaini, naglalaom man si Analyn na tulos na makukua an hustisya sa nangyari sa matua niyang aki.
