LEGAZPI CITY- Magharampang-hampang na sana suboot sa korte asin simbagon an mga isusunad na reklamo kontra sa mga mapoprobarang responsable sa nangyaring ‘measles outbreak’ sa nagkapirang parte kan Luzon asin Visayas.
Ini an nagin pagbwelta ni Public Attorneys Office (PAO) chief Atty. Persida Acosta sa intrevista kan Bombo Radyo Legazpi katakod kan garing pambabasol ninda Health Secretary Francisco Duque III asin dating Health Secretary Janette Garin na nagtalubo pa suboot an numero makalihis an pagbukas kan PAO sa dengue vaccine controversy na suboot nagcausa nin takot sa pagpapabakuna.
Segun ki Acosta, dae na suboot ini nabigla na mahanap nin mababasol an sekretaryo urog na aram na suboot kaining masabog an isyu sa tigdas anumang oras.
Nakapalaman suboot sa Commission on Audit (COA) report na nagbadol sa 2.4 million na mga kaakian an dae nabakunahan kan Diphtheria, polio asin measles vaccine puon pa kaitong 2015 mantang dae man nagsagibo nin massive campaign an ahensya kontra digdi huli ta mas tinawanan nin atensyon an pagbakuna kan anti-dengue vaccine na Dengvaxia.
Katakod kaini, inasegurar ni Acosta na papaimbestigaran an nangyari magin an pinadumanan kan pondong itinagama sa nasabing bakuna.
Klinaripikar man kan PAO chief na dae ini nagkokontra sa iba pang bakuna afuera na sana sa nasabing dengue vaccine mantang inengganyar an mga magurang na pabakunahan na an mga aki tangarig na malabanan an naglalangkaw na numero kan nagkakatigdas.
