LEGAZPI CITY — Kinumpirmar kan Philippine Institute of Volcanology and Seismology (PHIVOLCS) an panibagong naobserbarang paghubag o inflation sa bulkang Mayon.
Ipighayag ni PHIVOLCS Director Renato Solidum sa ekslusibong intrevista kan Bombo Radyo Legazpi na susog sa monitoring kan ground deformation data, nagkaigwa nin pagsakat sa sukol puon kan Abril makalihis na mairehistro an paghupa o pag-impis kaitong Marso.
Pag-eksplikar pa ni Solidum na nagpapadagos man an hydrothermal activity sa irarom kan bulkan na nagkakawsa nin saradit na pagputok na igwang kaibang asupre o kaya an puting aso kun napapakuluan nin mainit na volcanic materials.
Magigirumduman na nairehistro kasuodma an sarong short-lived degassing activity sa nasabing bulkan na nag-abot an abo sa kabangang kilometro an taas puon sa tuktok.
Inasegurar man kan opisyal na mantenidong nakatutok sa anuman na hiro kan bulkan na presenteng nasa Alert Level 2 status mantang tulos na ipapaaram sa publiko an anuman na pagbabago.
