LEGAZPI CITY—Ipigdoon ni Partido Manggagawa Spokesperson Wilson Fortaleza na bawal sa ley an pangingiaram kan korte sa isyu kan sweldo kan mga obrero.
Ini an kasunod kan pagluwas nin temporary restraining order kan Pasig Regional Trial Court Branch 152 sa P85 dagdag-sahod sa mga obrero sa National Capital Region (NCR).
Segun ki Fortaleza, sa intrevista kan Bombo Radyo Legazpi, ini an enot na bes na nakiaram an korte sa sweldo kan mga obrero kun sain inentertain kan korte an petisyon kan duwang petitioner na nagpupugol sa implementasyon kan naunambitang dagdag sahod.
Ipigdoon kaini na warang hurisdiksyon an korte para sa nasabing orolay.
Nagnagngalas man an grupo kun nata inapod ining ‘extraordinary’ huli sa kulang na kulang man liwat ini asin mas halangkaw pa an kaenot-enoting dugang na sahod na P25 kan taong 1989.
Huli kaini nagsunad an manlaeng-laeng grupo nin obrero nin urgent motion for leave to intervene nganing kwestyunon an korte sa ginibong TRO asin an posibleng pagsunad nin administrative case laban ki Pasig Judge Marie Joyce Manongsong huli sa ginibo kaining lakdang.
Nangapudan man si Fortaleza sa mga obrero sa Bicol na en kaso may siring na petisyon an sabihan an wage board na dae pagsunodon ini asin dae pagpansinon an ginibo kan korte sa Pasig huli sa ilegal o wara sa ley an ginibo kaini.
