Ipigbubusol ni Senate Committee on Agriculture, Food, and Agrarian Reform Chairman Senador Kiko Pangilinan na ilipat an parte kan pondong nakatagama para sa flood control sa Libreng Almusal Program para sa mga estudyante sa pampublikong eskwelahan.
Ini nganing masimbagan an naglalalang stunting, malnutrisyon asin halangkaw na numero kan mga nagpupundo sa pag-aadal na mga joven, siring man nganing matabangan an mga paraooma asin parasisira.
Afuera sa paglaban sa stunting asin malnutrisyon, tinawan-duon kan senador na an pagbabarewas nin libreng almusal puon kindergarten hanggang senior high school an makakatabang nganing mapahalangkaw an attendance asin learning capacity kan mga estudyante.
Sa irarom kan propwestong ley, kabanga kan budget para sa Libreng Almusal an itatagama sa pagbakal nin pagkaon gikan sa lokal na paraooma asin parasisira nganing masierto na presko asin masustansya an pagkaon kan mga estudyante.
Binanggit ni Pangilinan na maabot sa P11.7 bilyon an piggastos kan Department of Education (DepEd) para sa saindang feeding programs.
