(Update) LEGAZPI CITY – Padagos pang pig-iimbestigaran sa ngunyan kan mga otoridad an pagkakabisto kan suspek asin motibo sa insidente kan pambabadil-gadan sa sarong barangay kagawad sa ciudad nin Legazpi.
Sa intrevista kan Bombo Radyo Legazpi ki Bicol Regional Peace and Order Council (RPOC) Chair asin Legazpi City Mayor Noel Rosal, base sa pakikipagkoordinar sa kapulisan nagluluwas na posibleng pasahero man sana kan biktima asin Barangay Kagawad kan Bitano, Allan Del Ayre an suspek sa pambabadil.
Segun ki Rosal, wara man suboot sa ruta kan traysikel na pinagmamaneho kan biktima an Barangay Pawa kun sain nangyari an krimen, kaya posibleng inarkila pa ini kan suspek antes isagibo an plano.
Dugang pa kan RPOC chairman na posibleng pinagplanuhan nin maray an nangyari sa barangay official na nagadan sa apat na tama nin bala sa payo.
Mientras tanto, pighihiling naman kan mga otoridad an anggulong imbwelto sa iligal na droga an nasa likod kan insidente urog pang aktibo suboot an biktima sa mga anti-drug operations kan PNP bilang miyembro kan Barangay Anti-Drug Abuse Council (BADAC).
