LEGAZPI CITY – Nakalikom na nin labi P1 Millon an nagin pangapodan kan pamilya Lagman para sa restoration kan St. John the Baptist Church sa Tabaco City.
Magigirumduman na an nasabing simbahan an labing nadistroso makalihis an pangrarapado kan bagyong rolly sa provincia kan taong 2022.
Segun ki Tabaco City Mayor Krisel Lagman-Luistro sa intrevista kan Bombo Radyo Legazpi na nakalikom an naunambitang kantidad nin huli sa pangapodan ninda kan nakaagi na imbis na magdonate nin burak sa burol kan saiyang ama na si Congressman Edcel Lagaman, an mas maray na sanang kwarta an i-donate para sa pagpapakarahay kan simbahan.
Hinali suboot kan mga kongresistang miyembro kan Bicam an nakatalaang pondong ipigbusol kan saiyang ama para kuta sa renovation kaini na nag-aabot sa P35M.
Nagduduruman man suboot an mga tawo sa simbahan nganing personal na iabot an saindang tabang pinansyal para sa restoration process asin maipadagos an pag-aayus.
Pagdoon man kan opisyal na may resibo man na pigpapaluwas an manhamiento kan simbahan nganing maipahiling sa publiko kun napapasain an saindang pigtatao na tabang.
Magayon man suboot pag-hilingon na nakikisumaro an komunidad sa saindang obhetong maipadagos an mga napunan kan namaaram na kongresista.
Sa presente, nasa manhamiento na suboot an desisyon kun nuarin ninda pupunan an nasabing restoration kan St. John the Baptist Church.
Nagpapasalamat si Mayor Krisel sa mga nagsimbag sa pangapodan kan saindang pamilya nganing maipadagos an saro sa mga importanteng adbokasiya ni Cong. Lagman kan nabubuhay pa ini.
