LEGAZPI CITY—Pinahimotikan kan Panganiban Municipal Police Station an mga nagsisirkular sa social media mapadapit sa suboot nagdudukot nin mga kaakian sa banwaan kan Panganiban, Catanduanes.
Segun ki Panganiban MPS COP Police Captain Denver Romero, sa intrevista kan Bombo Radyo Legazpi, na may nag-post suboot sa social media na may nahiling na puting van na nagdudukot nin mga aki, alagad susog sa saindang pagberepika saro ining fake news.
Sa ngunyan wara man sindang nairerehistrong nawawara asin wara man nairehistro kan siring na insidente.
Segun sa opisyal na padagos nindang pigsagibo an responsibilidad para mamantenir an seguridad kan namamanwaan.
Abiso man kaini sa publiko na kun makahiling sinda nin siring na social media post, na makipagkoordinar sainda para maberipika an impormasyon.
Dugang pa kaini na dae mag-post kun an impormasyon bako beripikado huli ta nagkakawsa ini nin pagkatakot sa mga namamanwaan.
Pigtaram pa ni Romero na mahigot an saindang pakikipagkoordinar sa mga barangay officials asin mga eskwelahan mapadapit sa naunambitang isyu.
Igwa man suboot sindang pigbubugtak na mga personahes sa mga tinampo lalo na sa paglaog asin pagluwas sa eskwelahan kan mga kaakian.
Mientrastanto, nangapudan man an opisyal sa publiko na en kaso makaresibi nin siring na mensahe na dae tulos ipag-post sa social media asin makipagkoordinar sa saindang opisina para maberipika kun totoo an impormasyon.
