LEGAZPI CITY- Sa ika-duwang taon na anibersaryo kan Mamasapano clash na ikinagadan kan 44 Special Action Force (SAF) troopers sa pakikipagbakbakan sa Moro Islamic Liberation Front (MILF) asin Bangsamoro Islamic Freedom Fighters (BIFF) ginirumdom kan mga nawalat na pamilya an trahedya sa paagi kan pagpamibi.
Saro si Senior Inspector Max Jim Tria na tubong Virac, Catanduanes sa mga nagadan sa nasambitan na engkwentro kun sain ngunyan, sigon sa tugang kaini na si Julius Tria na nagsayuma nang magpa-intribista sa ere, igwa nin nangyaring “padasal” o pagpamibi para sa kalag kan naenot na kaparientes sa mismong harong ninda.
Nag-atindir man suboot an saindang mga magurang sa meeting na ipinaapod ni Presidente Rodrigo Duterte kasuudma sa Malacanang.
Binalikan man kan nagkapira an memorya ki S/INSP Tria na talagang pangaturugan kaini na magin pulis kun sain sa labing isog, urog na mamawoton pa suboot kaini na lumaban asin magadan kesa magsurindir.
Topnotcher si Tria sa Sniper School, nagsabak sa Scout Ranger asin Commando Trainee na parte kan Philippine National Police Academy Class kan 2009.
Kun magigirumduman, si S/INSP Tria an binansagan na “tigre” kan SAF asin pigtutubudan na “Last Man Standing” sa nangyaring bakbakan sa Mamasapano na ikinagadan kan Jemaah Islamiyah bomb expert na si Mawran na igwang nakakabit na reward money na $5 million karibay kan payo kaini.
Mientrastanto, sa nagin pag-oolay sa Malacanang kasuudma, sinabi ni Presidente Duterte na hasta sa dae nasisimbag an mga kahapotan dapit sa trahedya, dae makakapahingalo an isip asin mauulian an kulog na namamatean kan mga pamilyang nawalat kan SAF 44.
