LEGAZPI CITY—Nakatalaang pupuonan na an pagkonstruir kan mga edipisyo partikularmente na sa Brgy. Taysan, Legazpi City, Albay an 15,000 housing units para sa 4PH Program o Pambansang Pabahay Para sa Pilipino na programa kan gobierno.
Segun ki Legazpi City Mayor Alfredo Garbin Jr., sa intrevista kan Bombo Radyo Legazpi, pig-consolidate na an mga plano ngonian na semana para sa pag-apply nin building permit asin kun nakua na an magkakanigong permiso saka magkakaigwa nin groundbreaking ceremony na target man sa maabot na bulan kan Abril.
Dugang kan opisyal na target man na sa second quarter sa masunod na taon yaon na an site development kairiba na an enot na edipisyong may 500 housing units an matatapos na nindang ikokonstruir.
Maabot sa 30 ektarya na daga an tutugdukan kan nasambit na pabahay.
Sinabi kan alkalde na an kwalipikado sa naunambitang pabahay iyo an mga warang harong, biktima nin mga eviction, informal settlers, asin miyembro kan Pag-IBIG.
Mientrastanto, nagpasalamat man ini sa gobierno sa pagdara kan nasambit na programa sa ciudad.
