Nagluwas sa inisyal na imbestigasyon kan Department of Education (DepEd) na posibleng planado an nangyaring pambabadil sa sarong eskwelahan sa Tacloban City na ikinagadan nin tulong indibidwal asin ikina-irido nin 20 iba pa.
Segun ki Education Secretary Sonny Angara, basado sa report kan sarong adviser, tahimik an saro sa mga estudyante na imbwelto asin dae ini naglaog sa eskwelahan nin haros sarong semana antes nangyari an insidente.
Nagluwas man sa imbestigasyon na pigtataram na igwa sindang ‘activity’ sa Manila.
Sinabi pa ni Angara na may impormasyon na posibleng igwang group chat an mga suspek na menor de edad asin pigtutukoy na sarong ‘mission’ an ginibong plano kan mga ini.
Dugang pa kan opisyal na alagad bako pa ini pinal na konklusyon, nagluwas na posibleng pinaghandaan an insidente.
Sinierto man kan DepEd na magtatao nin psychosocial support sa mga paratukdo asin mga empleyado kan eskwelahan, asin magdedesignar man nin guidance counselor ngani na magtabang sa mga apektadong estudyante.
Sa presente nasa kustodiya kan Tacloban City Social Welfare and Development Office an duwang menor de edad na suspek na edad 14-anyos asin 15-anyos.
