LEGAZPI CITY- Nanglumo an panayuhan kan Banuang Gurang National High School sa banwaan kan Donsol, Sorsogon makalihis na madistroso an mga kagamitan kan eskwelahan huli sa bagyong Enteng.
Napag-araman na nalubog sa baha an nasabing eskwelahan huli sa matinding mga pag-uran.
Segun sa principal kan nasabing eskwelahan na si Eva Reduta sa intrevista kan Bombo Radyo Legazpi na hasta sa ngunyan kanselado pa an klase sa nasabing eskwelahan.
Naraot kaya an mga personal laptops asin projectors kan mga paratukdo, siring mna an mga tukawan, lamesa, electricfan asin an mga learning materials na dae na suboot magagamit.
Aminado an opisyal na dae ninda pinaglaoman na magkakawsa nin pagbaha an naeksperyensyahan na mga pag-uran urog pang weekend kan tumama an nasabing raot nin panahon.
Sa presente pigsisikap na suboot kan mga paratukdo na maibalik na an klase alagad pigpapahiling pa suboot an mga electrical wirings na inabot nin tubig baha ngani na masierto na dae ini magkakawsa nin aksidente sa mga estudyante.
Napag-araman na nagtatarabangan na man an mga estudyante, paratukdo asin nagkapirang volunteers ngani na malinigan an mga gamit siring kan tukawan, lamesa asin iba pa.
