LEGAZPI CITY- Nag-apelar ngonian an National Food Authority (NFA) sa publiko asin iba pang haralangkaw na opisyal kan nacion na pakusugon asin bako i-abolish an opisina.
Ini an katakod kan ipigpopropuesto na buwagon na sana an nasabing opisina huli sa pigkakahampang na isyu sa hibabang stock asin problema sa importation.
Segun ki Lilibeth Jacob, tagapagtaram kan NFA Bicol, igwang mga nagkapirang senador na dae nakakasabot kan totoong mandato kan opisina na dae pigpapasipara an totoong problema asin urog na pigtutukan an negatibong lado siring kan sala suboot na pamamalakad.
Dawa pa dae aram kun ano an bilog na napag-olayan kan NFA administrator asin NFA council, sierto man suboot na para ini sa karahayan kan kadaklan urog na an ‘pooerst of the poor’.
Bako naman suboot bago an mga pangapodan na buwagon o i-privatize an NFA na nadadangog na sa laog nin duwang dekada alagad naka-antabay man sana sa magigin direktiba.
Mientras tanto, kilinaripikar man ni Jacob na kaipuhan masabutan na bako man gabos na ipigtatagamang pondo sa ahensya para sa procurement kan paroy an nag-aabot sa P7 billion kun saen nagbabago-bago man suboot ini sa kada taon mantang luwas pa digdi an gastos sa operating expenses.
Bilang government-owned and controlled corporation (GOCC), ipighayag ni Jacob na nagsasadiri pa sindang hiro para sa nasabing panggastos magin sa sweldo.
