LEGAZPI CITY – Dae pigtutubudan kan grupo nin mga paratukdo an pahayag ni Vice President Sara Duterte na nagin magayon suboot an saiyang panenerbihan bilang kalihim kan Department of Education.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na warang moral an bise sa saiyang binutasang taramon huli ta kan panahon niya sa kagawaran an labing nagpabagsak sa kalidad kan edukasyon sa nacion na nagpapadagos sagkod ngonian.
Sa ibong kan suboot siya sana an kalihim na nagsagibo nin mala-State of the Nation Address sa saiyang basic education report alagad wara man nin signipikanteng nabago sa saiyang termino kundi an naglala pa an kakulangan nin paratukdo asin learning materials.
Paghistorya niya pa na naghagad pa an bise nin kadugangang pondo para sa pagtataong sulusyon kan mga krisis sa sektor alagad napaduman sana ini sa katiwalian asin anomalya.
Pigtaram pa kaini na dae ninda malilingawan si VP Sara huli ta an mga ipig-dudulok nindang problema kan mga paratukdo an dae lamang hinampang kun kaya wara dapat siyang ipag-orgolyo sa saiyang termino.
Maski suboot nagpalit na nin liderato sa DepED, nagtetenir na hababa an pondo kan education sector sa masunod na taon maski ikompara pa si VP Sara sa presenteng kalihim na si Former Senator Sonny Angara.
Tugot man siya na ilipat sa saindang sector an pondong ibabawas sa flood control program para sa 2026 National Expenditure Program huli ta haloy na nindang pigpapangapodan an siring kaining paglilipat urog nang kadakol na katiwalian an nangyayari sa flood control projects.
Pagdoon man ni Quetua na warang direchos si VP Sara na magtaram manungod sa kautikan asin kapanahunan niya sa Department of Education.
