LEGAZPI CITY- Matrangkilong nagtapos kasuudma an Palarong Bicol 2017 na ipig-describer kan Legazpi PNP bilang “very peaceful” asin “orderly.”
Sa intribista ki PSUPT Nilo Berdin, hepe kan nasambitan na pulisya, dae man sinda nin nairehistrong insidente katakod kan pitong aldaw na sporting event na isinagibo sa syudad kan Legazpi.
Ibinida man kaini na dae nin nagin problema sa trapiko huli sa saindang binilog na order of exit na ipinautob puon kan pagbubukas kan Palaro hasta sa pagtatapos kaini.
Sigon sa hepe, tinawanan nindang prayoridad an mga lulunadan na behikulo kan mga delegado kun kaya paramientras na ipigsarado an tinampo para sa mga byaheng Daraga-Legazpi.
Saro-sarong nag ruluwas sa gate kan Bicol University an lambang delegado na natapos sa oras na alas 7:00 nin banggi kun sain an Masbate City an panghuri base na man sa order of exit.
Maogma man si Berdin na dae nin nagreklamo dapit sa overcharging sa pamasahe kan mga tricycle drivers sa syudad.
Sa hudyan, nagpasalamat ini sa gabos na pulisya espesyalmente sa Albay asin Bicol PNP, sa mga ahensya kan gobyerno asin sa media na katabang suboot kan Legazpi PNP ngani na magin matrayumpo an pag-host kan Legazpi sa Palarong Bicol 2017.
Nagpapasalamat man si Berdin sa Kagurangan huli sa itinaong magayon na panahon sa bilog na event.
