Nagboto na an mga namamanwaan sa Sri Lanka kan masunod kaining presidente makalihis an naeksperyensyahan na financial crisis sa nasabing nacion.
Nagmamawot si President Ranil Wickremesinghe na maipagpadagos an mga ipinaotob na lakdang na nagsalbar sa ekonomiya asin nagtapos sa nagkapirang bulan na kakulangan sa pagkaon, krudo, bulong asin iba pa.
Marurumduman na an duwang taon na pagtukaw kaini sa posisyon an nagpabalik sa paz y orden makalihis an civil unrest na nagbungkaras kan 2022.
Kaibanan sa mga kalaban kaini sa pagka presidente sinda Anura Kumara Dissanayaka na lider kan Marxist party na nagpromesa na babagugon an corrupt political culture kan nacion.
Saro pa sa mga kandidato an opposition leader na si Sajith Premadasa na aki kan dating presidente kan nacion.
