LEGAZPI CITY- Nagtutubod an National Telecommunications Commission (NTC) Legazpi na dakulang tabang an pagkakapirma ni Presidente Ferdinand Marcos Jr. bilang ganap na ley sa Sim Card Registration Law sa obheto kan ahensya na matapos an problema sa paglakop kan text scams.
Segun ki NTC Legazpi Information Officer Atty. Judy Bilangel sa intrevista kan Bombo Radyo Legazpi, maugma man an ahensya sa nasabing development huli ta makakatabang ini sa mga law enforcement agencies na mas marikas na mapanimbag an mga nasa likod kan mga scams.
Nakapalaman sa ley na an NTC an pig-oobliga na magbilog nin implementing rules and regulations.
Katakod kaini, pinaglalaoman na maipapaluwas an IRR sa masunod na mga bulan ngani na mas magin malinaw an mga ipapaotob na polisiya.
Dugang pa ni Bilangel na pigtatawan an simcard users nin 180 days ngani na iparehistro an mga eksistidong sim huli ta pwedesir na ma-deactivate enkasong dae maiparehistro.
Marurumduman na kinakaipuhan na itao an mga personal na impormasyon ngani na makapagparehistro kan saindang mga sim card.
Pighayag man ni Bilangel na sa irarom kan ley, wara man na prohibisyon kun pirang simcard an gagamiton kan sarong persona alagad kinakaipuhan na siertuhon na nakarehistro an mga ini.
