LEGAZPI CITY- Nagtetenir na halangkaw an buga nin sulfur dioxide sa bulkang Mayon, basado sa monitoring kan Philippine Institute of Volcanology and Seismology na nangangahulugan na padagos an pagtaas kan magma sa bulkan.
Segun ki PHIVOLCS Volcano Monitoring and Eruption Prediction Chief Mariton Bornas sa intrevista kan Bombo Radyo Legazpi na alagad nagkakaigwa nin pagbaba sa rockfall asin pyroclastic density currents o uson sa nakalihis na mga aldaw, dae ini nangangahulugan na mapundo na an aktibidad kan bulkan.
An rockfall asin uson an nagsasaliming kan padagos na pagluwa asin pag-collapse kan lava hali sa bulkan.
Segun sa opisyal na basado sa assessment, medyo nasasaid na kan Mayon volcano an amunto kan magma na ipigpuputok kaini kada eruption huli ta nasa 83 million cubic meters na an nai-luwa na halangkaw sa normal na pigpuputok kaini.
Napag-araman na an tipikal na volcanic material kada eruption an nasa 30 million cubic meters hasta 40 million cubic meters sana, basado sa pagkakarkulo.
Alagad kun magpapadagos sa ika-pito o ika-walong bulan an aktibidad kan bulkan, ini na an panibagong record kan lava effusion event.
