LEGAZPI CITY- Direktang ipighayag kan Philippine Ports Authority (PPA) Bicol na “eye-opener” para sa gabos na pantalan kan rehiyon an nangyaring pagpapasabog nin improvised explosive device (IED) harane sa pantalan kan Masbate City.
Sa intrevista kan Bombo Radyo Legazpi ki PPA Bicol Acting Ports Manager Fatima Reaso, kakabit kan insidente an pangangaipo sa paghihigot pa kan ipinapaotob na security measures sa mga pier.
Klinaripikar man kan opisyal na dawa pa sabihong warang lapses, mandato man giraray kan mga security personnel kan pier an salbado asin “secured” na pagbiyahe kan publiko.
Katakod kaini, ipinagsugo na kan PPA central office sa mga security guards, port police asin terminal managers an pagsusumiter nin report sa estado o kamugtakan kan pier na pigbabantayan sa kada anom na oras.
Kaibanan sa mga pigtututukan ngonian kan PPA an mga pantalan sa Tabaco asin Pio Duran sa Albay; Catanduanes ports, Camarines provinces ports siring man an Bulan asin Matnog ports kan Sorsogon.
