LEGAZPI CITY- In-extend pa kan Bangko Sentral ng Pilipinas (BSP) an deadline sa pagribay sa mga lumang bank note o kwarta.
Disyembre 31, 2016 kaya an orihinal nindang ipigtalaan na deadline alagad holiday an Disyembre 30-31 kun kaya dae nakapagribay an iba.
Huli na man sa kahagadan kan publiko, pinalawig pa ini nin hasta sa Marso 31, 2017.
Sigon ki Paulette Santiago Mengilla, research officer kan BSP, pwedesir na darahon sa mga otorisadong bangko an mga lumang kwarta.
Epektibo puon sa Abril 1, dae na suboot aakuon kan mga bangko an lumang denominations huli ta demonitized na ini o dae na nin kantidad.
Dugang pa ni Mengilla, igwa man nin binilog na lakdang an BSP para sa mga Overseas Filipino Workers (OFWs) na may darang lumang kwarta kun sain mafill-out sana an mga ini sa mga detalyes na ihahapot sa web link na https://orbs.bsp.com.ph
Alagad dae dapat maglampas sa P10,000 an kwartang ipaparibay susog na man suboot sa ley na nagbabawal sa mga OFW na magdara nin labi sa P10,000 sa ibang nasyun.
Mientrastanto, sinabi man ni Mengilla na piglalaoman na maabot na ngunyan na bulan sa syudad kan Legazpi an mga bank notes na igwa na nin pirma ni Presidente Rodrigo Duterte.
Klinaro man kaini na pirma asin an logo man sana kan BSP an mababago sa disenyo kontra sa mga nagluluwas na impormasyon sa social media na may pandok na ni Duterte an ibang denomination.
