LEGAZPI CITY- Pig-oobserbaran ngunyan na aldaw an pagpuon kan panahon kan Kwaresma o Lenten Season sa paagi kan Ash Wednesday.
Ineksplikar kan opisyal kan Diocese of Legazpi asin Executive Director kan Social Action Center na si Father Rex Arjona na ini an panahon kun sain nagpapa-krus nin abo sa angog an mga Katoliko.
Sigon ki Father Arjona, simbolo an abo na an buhay kan tawo, matatapos man sana alagad siertong dae matatapos sa kagadanan huli ta igwa nin kwarenta diyas makalihis an panahon kan Kwaresma kun sain pig-gigirumdom an liwat na pagkabuhay ni Hesu Cristo.
Ini suboot an nagpapaabot kan paglaom na an pagkabuhay man giraray an maurog kumpara sa kagadanan.
Apwera digdi, sinabi man kan padi na ini man an tsansa ngani na pagpadabaon an mga nagtitirios na kahimanwa sa paagi kan pagtabang asin pagpamibi para sa mga ini.
Mientrastanto, dakol na tawo ngunyan an nagpapasiring sa simbahan ngani na mag-atindir kan Ash Wednesday mass asin makisumaro sa pag-obserbar kan nasambitan na espesyal na panahon para sa mga Katoliko.
