LEGAZPI CITY- Dae na nabigla an grupo nin mga health workers sa anunsyo ni Presidente Ferdinand Marcos Jr. na pagpapaluwas kan P27-billion arrears kan gobierno para sa COVID-19 health emergency allowance kan mga healthcare workers.
Paliwanag ni Alliance of Health Workers President Robert Mendoza sa intrevista kan Bombo Radyo Legazpi na posibleng gamiton ini bilang pampa-pogi sa nakatalaan na State of the Nation Address kan presidente ngunyan na Hulyo.
Nagtutubod an grupo na posibleng warang mai-oorgulyo an presidente sa saiyang State of the Nation Address afuera sa mga international travel kaini kaya pigpahidali sa Department of Budget and Management an release kan nasabing pondo.
Segun sa opisyal na haloy na panahon ng pighahalat an nasabing health emergency allowance urog pang dakol na an mga binawian nin buhay durante kan pandemya asin dakol na mga health workers na an nagpasiring sa ibang mga nacion.
Katakod kaini, sinabi kan opisyal na dapat na sa laog nin sampulong aldaw mai-release na sa mga rehiyon an P27-billion na pondo asin maitao na sa mga ospital ngani na mapakinabangan kan mga health workers.
Kinakaipuhan man suboot na maisabay sa matatawan nin kompensasyon magin an mga nasa ibang nacion na urog pang nagtrabaho man an mga ini asin nagsakripisyo durante kan pandemya.
Mientras tanto, pigpapatutukan man ni Mendoza an suboot dae naglalangkaw na sweldo kan mga health workers sa nacion asin an padagos na understaffing na nagreresulta sa halawig na oras na pagtatrabaho kan mga ini.
