LEGAZPI CITY — Ipig-orgulyo ni Mayor Noel Rosal an mga naresibeng onra kan syudad kan Legazpi kan mga nakalihis na bulan.
Segun ki Rosal, pignumbrahan kan Department of Environment and Natural Resources (DENR) an lugar huli sa pagpapasara kan mga dumpsites.
Apwera pa kaini, mapadagos man an 2 taong grant para sa local government unit hale sa US Agency for International Development (USAID).
Naglalaom man an alkalde na maserbi ini bilang inspirasyon sa lambang namamanwa kun kaya ngane suboot na mas maipadagos an napunang trayumpo, kaipuhan na makisumaro kan gabos sa pagpapakusog kan financial o cash flow.
Sa paagi kaini, posible suboot na mautob na an life-changing program kan gobyerno na pagkonstruhir kan mega bridge na makonekta sa Luzon, Visayas asin Minadano.
Nagtutubod man si Mayor Rosal na an railway o tren an pinakabaratong klase nin transportasyon huli sa kadakol suboot an naisasakay digdi.
Kun kaya segun sa alkalde, kaipuhan na mapakaray an Philippine National Railways (PNR).
Pupunan suboot an pagkakaigwa nin PNR pa-Matnog, Sorsogon ngane na mahali na an bansag na ‘poorest region’.
Kun magiging fully rehabilitated an PNR, segun ki Rosal, bako sana tawo an maisasakay kaini kundi maging an mga properties na napaka-problema kan rehiyon.
Apwera pa kaini, matugdok naman nin mega highway hale sa Manila pasiring sa Legazpi o Visayas na mapahalipot kan byahe sa anom na sanang oras.
Ikokonekta suboot an Calamba pasiring Naga kun saen dae na susunudon pa an mga paikot-ikot na mga ruta.
Positiboman an alkalde na magigibo an gabos na proyektong ini sa laog nin anom na taon.
