LEGAZPI CITY — Padagos man giraray na naoobserbaran sa probinsya kan Albay an pagpapapako sa krus kan nagkapirang deboto tuyong panahon kan Semana Santa.
Sa intrevista kan Bombo Radyo Legazpi kay John Patrick Anteguera 24 anyos, residente kan Barangay Peñaranda, Legazpi City, parte na kan saindang tradisyon an nasambitan na aktibidad na taunan na ipigsasagibo sa lugar.
Pigbuyagyag man kaini na walong taon na niyang pigigibo an pagpapa pako sa krus puon pa kan siya an 16-anyos pa sana.
Nagtutubod ini na dakulang tabang para sa saiyang pamilya an panata niya huli ta dae nagkakahelang an mga ini asin nagigin mas marhay an dalagan kan saindang trabaho.
Mientras tanto, dae man pighahali ni Anteguera an posibilidad na pagpundo sa saiyang debosyon enkaso makahanap nin ibang deboto na masalida saiya sa pagpapapako sa krus.
