LEGAZPI CITY — Pormal nang ipiglunsar ngonian na aldaw an proyekto kan 9th Infantry Spear Division kan Philippine Army sa kabikolan sa obhetong makatabang sa mga residente kan ciudad kan Marawi na nasa tahaw kan nagpapadagos na krisis huli sa pagsakyada kan mga teroristang grupo.
Sa intrevista kan Bombo Radyo Legazpi ki Capt. Randy Llunar, tagapagtaram kan 9th ID, napag-araman na mismong si Major General Manolito Orense, an siyang nagpuon kan aktibidad na “Pagmakulog sa Sadiring Lahi.”
Dugang pa ni Llunar na dakol kaya suboot an nagpapahayag nin kamawotan na makatabang alagad dae aram kun papano ipapaabot ini kun kaya pinunan kan 9th ID an inisyatiba.
Pagpapahiling nin kabayanihan an saro pa sa mayor na rason kan paglulunsar kaini sa manlaen-laen na parte kan kabikolan.
Sa ngonian, inengganyar kaini an gabos na makisumaro sa nasabing aktibidad.
