LEGAZPI CITY- Matrayumpo an nagin resulta kan pagtatarabangan kan anom na provincia sa Bicol tangarig na magpaabot man nin dugang na asistensya sa mga bakwit o an mga residenteng apektado kan krisis sa ciudad ka Marawi.
Ipiglunsar kan 9th Infantry Spear Division kan Philippine Army an ‘Pagmakulog sa Sadiring Lahi’ kan Hunyo 19 na nag-engganyar sa lambang Bicolano na magdonar, cash man o in kind para sa mga Marawi evacuees.
Sa intrevista kan Bombo Radyo Legazpi ki 9th ID Public Affairs Office chief Capt. Randy Llunar, nakatipon suboot an pwersa kan mga militar nin maabot sa P1 million pesos o P895, 679 na cash mientras na nasa 190 sako man nin bagas asin labi sa 200 man na karton nin manlaen-laen na goods siring na sana kan mga de lata, bado, noodles, tubig, pagkaon, asin iba pang gamit sa hygiene.
Igwa man na nagpadara nin reading materials para sa mga estudyante asin mga kawatan para sa mga kaakian siring man an bulong para sa mga naghehelang.
Apat na 6 by 6 truck an madara kaini sa pangengenotan ni Capt. Ronnie Madriñan pasiring sa ciudad kan Iligan.
Sakay kan sarong cargo ship, mabiyahe ini puon sa Tabaco City port pasiring sa Catanduanes hasta sa Iligan kun saen naghahalat an mga personahes kan 49th IB na maasegurar sa ligtas na pagbiyahe kan mga items hasta sa pormal nang maiturn over sa Dept. of Social Welfare and Development (DSWD) kan Iligan City.
Dae man nalingawan ni Llunar na magpasalamat sa gabos na Bicolanong nagtao nin tabang para sa nasabing proyekto.
