LEGAZPI CITY — Nakatalaan na isagibo an sarong aktibidad sa provincia kan Masbate na obhetong mahiling an pagkakaburunyog asin pagtatarabangan kan lambang Bicolano tangarig na maiabot sa mga nasa dipisil na sitwasyon sa ciudad kan Marawi.
Pangengenotan kan 9th Infantry (Spear) Division, Philippine Army sa pakikipagkoordinar na sa Provincial Government kan Masbate, mga ahensya de gobyerno asin Philippine National Police an paglulunsar kan “Pagmakulog sa Sadiring Lahi.”
Segun ki PS/Supt. Froilan Elopre, Masbate PNP Provincial Director, mangyayari ini sa maabot na Lunes, Hunyo 19 sa kapitolyo.
Aakuon kan mga organizer an mga donasyon, cash man o in kind na ipapadara sa mga biktima kan kariribukan sa Marawi City siring man sa mga nawalat na pamilya kan mga nagbuwis nin buhay sa bakbakan.
Pigpepensar na dakula an maitatabang kaini sa sitwasyon kan mga residentes na padikit-dikit nang nagkakahelang asin an iba an wara nang pigkakaon huli sa pagkaipit sa giyera kan tropa kan gobyerno asin teroristang Maute.
