LEGAZPI CITY – Namatean man kan mga paratienda nin sira sa Legazpi City Public Market an pagluya kan supply kan galunggong na pigtutukdong rason kan paghalangkaw kan presyo kaini.
Segun ki Legazpi City Public Market Fish Vendor Association Vice President Ramon Trilles sa intrevista kan Bombo Radyo Legazpi na narisa ninda na 200 kilos na sana an naibabagsak na galunggong sa nasambitang merkado hale sa 300 sagkod 500 kilos.
Afuera sa galunggong an kabale man suboot sa mga nagharalangkaw na sira an yellow fin, bangus na gikan sa dagat asin fishpond mantang warang pagbabago sa presyo kan tuna asin tilapia.
Alagad dae man siya kumbinsido sa pahayag ni Department of Agriculture (DA) Secretary Francisco Tiu Laurel Jr. mapadapit sa pagkaon nin manok bilang alternatibo sa galunggong.
Paliwanag kan paratienda na mas halangkaw pa man sa presente an presyo kan manok kompara sa sira sa Legazpi City Public Market mantang halangkaw sana an presyo kun sira kun magagayun an mga klase kaini asin kun dakula.
Mas pig-aaprobitsaran pa man kan mga konsumidores an saindang panindang sira partikulamente na an mga senior citizen na mas pigpipili an sira na masustansya suboot kompara sa karneng manok.
Pangapodan ni Trilles sa mga konsumidores na magbakal nin sira sa Legazpi City Public Market huli ta nagtetenir ining barato asin dae nawawaran nin supply.
