LEGAZPI CITY – Nabigla suboot an Simbahang Katoliko sa pagkakalusot kan propuestong liwat na pagbuhay sa padusang kagadanan sa Kamara de Representantes kasuudma.
Sa intribista kan Bombo Radyo Legazpi ki Father Paul Ocfemia, tinawan duon kaini na sagrado an buhay kan tawo asin dae nin siisay man sa kinaban an igwa nin poder na magkua nin buhay kan kapwa.
Sigon ki Father Paul, igwa pa nin ibang lakdang ngani na mapuho an kriminalidad arog kan pagpapakarahay sa implementasyon kan ley.
Dae man suboot mababayadan an nagibong sala kan sarong kriminal kun gagadanon ini.
Para sa padi, nagpapahiling an pagpasar kan death penalty sa pagpapa-urog sa karatan huli sa kamawotan na makabalos asin dae magkakaigwa nin “healing” sa sosyudad apwera na sana kun magpapatawad.
Kinuwestyon man kaini an paghali sa nagkapirang heinous crimes sa death penalty bill arog kan plunder na nagpapahiling suboot na igwa nin maraot na obheto an mga pro-solons sa pagpasar kan propuesto.
Mientrastanto, sinabi kan padi na urog na marhay man giraray na tawanan nin tsansa an mga nagkasala ngani na makapagbagong buhay asin magin testigo nin karahayan.
