LEGAZPI CITY – Aminado an National Food Authority (NFA) Bicol na urog pang nagbaba an average kan local procurement kan paroy. Katakod ini kan mandato kan ahensya sa irarom kan Rice Liberalization Act na itatagama an nasabing paroy para sa 15 days buffer stock na magagamit durante kan mga kalamidad.
Sa intrevista kan Bombo Radyo Legazpi ki NFA Bicol Director Henry Tristeza, nagbaba sa 750 bags per day an average daily procurement kasabay kan paglaog kan lean months o panahon nin tanuman kan mga paraoma na piglalaoman na madurar hasta sa Setyembre.
Alagad segun ki Tristeza, short man giraray sa natatadang 5-day requirement sa stock.
Maibabalik sana suboot sa 3, 000 hasta 5, 000 bags nin paroy an pagbakal kun mag-abot an bulan kan Oktubre na mag-aanihan naman.
Naibaba naman gabos kan enot na semana kan Mayo an mga imported rice kun kaya igwa nang 10-day buffer stock sa mga bodega na maabot sa 405, 000 bags.
