LEGAZPI CITY – Ipigkokonsiderar na “once-in-a-lifetime” event kan sarong photographer sa Masbate na makapag-capture nin magayon asin klaradong ladawan kan comet Neowise.
Nag-setup nin camera sa boulevard kan Masbate si Lobo asin matrayumpong nakuwaan nin ladawan an kometa.
Sa intrevista kan Bombo Radyo Legazpi ki Steffany Joy Lobo, freelance photographer, garing pinalad sa nangyari urog na maliwanag an kalangitan kasubanggi.
Hinalat muna nindang mahali ang panganuron makalihis an sunset asin nagdurar sana nin haros 20 minutos an klaradong view kan kometa kaya limang shots sana an nakuwa ni Lobo.
Istorya pa kaini na puon pa kan college kan kinahiligan an pagkuwa nin mga ladawan asin mantenidong hobby ini maski ngunyan na may trabaho naman sa sarong pribadong kumpanya.
Sinabi pa ni Lobo na priceless an mga siring kaining kuwang ladawan afuera pa sa kinahihiligan niyang street photography, landscapes asin portraits.
Mientras tanto, matukad pa ini sa Mayong-Payong sa Mobo asin mabiyahe pa nin 3.5 kilometers tangarig liwat na mahiling an kometa sa Hulyo 23 na sinasabing pinakahiling an astronomic object depende sa panahon.
