LEGAZPI CITY — Padagos pang pig-iimbestigaran sa ngunyan an nangyaring pagkulog kan tulak kan mga inmates sa Bureau of Jail Management and Penology (BJMP) sa Ligao City na pigtutubudang huli sa pagkakan na idinistribuir sa laog mismo kan pasilidad.
Sigon ki Jail S/INSP Joseph Lucila, premature pang magtao nin konklusyon dapit sa kawsa kan nasambitan na insidente alagad sienerto man kaining malinig an kusinang piglulutuan kan mga pagkakan kan gabos na nasa laog kan BJMP.
Dugang pa ni Lucila, bako man ini regular na nangyayari kun kaya maaapod na saro man sanang “isolated case.”
Nagtutubod an opisyal na igwa sanang dae natawanan nin atensyon mientras na pighahanda an pagkakan na idinistribuir sa mga inmates o baad huli sa panahon.
Nagpahayag man ini nin kamunduan sa nangyari kasabay kan pagsiertong gigibuhon ninda an gabos ngani na dae na mautro an siring na insidente.
