LEGAZPI CITY – Ginibong basehan kan mga otoridad an pagkawara kan presensya kan New People’s Army (NPA) sa probinsya kan Catanduanes sa pagdeklara kaini bilang Insurgency Free.
Segun kay MAJ Frank Roldan, Spokesperson, 9th Infantry Division (9ID) Philippine Army sa intrevista kan Bombo Radyo Legazpi na nawara an presensya kan NPA sa probinsya nin huli ta nagsurrender an iba mantang nagadan man sa Military Operation an iba.
Nagbase man sinda sa mga pahayag kan mga dating rebelde na nagbalik loob sa gobyerno na wara na sinda nahihiling na presensya kan rebeldeng grupo sa lugar.
Dae man pighahale ni Roldan an posibilidad na magbalik giraray an presensya kan NPA asin magkawsa nin matinding kariribukan sa probinsya.
Maiibitaran an pagbalik kan presensya kan mga rebeldeng grupo basta’t syertuhon suboot kan gobyerno na naitatao sa mga namamanwaan an saindang karapatan asin pangangaipuhan.
Madali na man maideklara an probinsya kan Sorsogon asin padagos an saindang pag-enganyar sa mga rebeldeng grupo na magbalik loob na sa gobyerno nganing matawan ninda ini nin magkakanigong tabang.
Pangapodan ni Roldan sa lambang bikolano na suportaran an saindang programa nganing matapos na an labi limang dekadang insurhensyang naghahadlang sa pag-uswag kan mga lugar sa enterong rehiyon.
