LEGAZPI CITY- Target kan Presidential Task Force on Media Security (PTFoMS) an paghale kan pangaran kan Pilipinas sa listahan kan mga nacion na haralangkaw an impunity asin unsolved cases kan media killings kasunod kan pagbagsak sa 5th rank sa 2017 Global Impunity Index.
Sa ekslusibong intrevista kan Bombo Radyo Legazpi ki Task Force on Media Security Executive Director Usec. Joel Egco, indikasyon an datos nin pagbabago sa paghiling sa Pilipinas puon sa pagigin saro sa mga nacion sa kinaban na ipigkokonsiderar na pinakadelikadong lugar para sa mga taga-media.
Nakatalaan man na ipaapod kan task force an kapulisan para sa ipapaluwas na media security protocol asin sa obhetong maikorehir an haloy na law enforcement sa mga kasong may kinaaraman sa media killings.
Napag-araman na komon na rason kun nata napapasabak sa panggagadan partikular na an mga nasa lokal na media, iyo an iwal sa kapwa man sana taga-media alagad igwang ibang interes.
Mahagad man an task force kan mga listahan kan mga kagsadiri kan darakulang radio networks, newspapers asin TV stations tangarig maimbestigaran kun ano an rason sa pagtugdok nin siring na negosyo.
Inako man kan opisyal na dipisil an pagkawara sa listahan, alagad hihinguwaon kan task force na mapababa pa an ranking sa ikaanom o ikapitong pwesto sa masunod na taon hasta sa dagos nang mabura an pangaran kan Pilipinas sa listahan sa pag-abot kan taong 2020.
