LEGAZPI CITY — Pagkamoot na igwang kaibanan na pagpangadye para sa apektadong populasyon kan nag-aalburotong bulkang Mayon an mensahe kan ama kan provincia kan Albay katakod kan selebrasyon kan Valentines Day ngonian na aldaw.
Sa mensaheng ipinaabot ni Albay Governor Al Francis Bichara sa official Facebook account, binati kaini an gabos sa maogmang aldaw kan mga puso kasabay kan kahagadan na magtenir an pagheheras kan pagkamoot sa mga Albayano.
Dae man nalingawan kan opisyal na ipagirumdom an pagkamoot sa mga kahimanwang nagtetenir sa evacuation centers kun saen pangadye man giraray suboot an pinakaimportanteng maiheheras sa lambang-saro urog na kasabay man kan selebrasyon an pagpuon kan Lenten season o Ash Wednesday.
Katakod kan importanteng okasyon, naglilibot man an mga padi sa mga evacuation centers tangarig na magsagibo nin pagkakaag nin abo sa angog bilang tanda kan abstinence o pag-aayuno kan mga ini.
Mientras tanto, napag-araman hale ki Albay Public Safety and Emergency Management Office chief Dr. Cedric Daep na labi sa 60, 000 man giraray an numero kan mga evacuees na dae pa nakakauli sa nagpapadagos na aktibidad kan bulkan.
