LEGAZPI CITY – Pig-eksplikar kan sarong peace studies professor an nangyayaring riot sa nacion kan Indonesia asin an wala-toong rally na nangyayari ngonian sa Pilipinas huli sa mga maanomalyang flood control projects.
Segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na nagin ugali na kan Indonesia an mga pagkondusir nin riot huli sa mga namamatean nindang sitwasyon asin problema partikular na an halangkaw na sweldo kan mga Indonesian Politicians.
Sa ibong kan sadit pa sanang protesta an nangyayari sa Pilipinas an may posibilidad pa ining magdakula kun kaya importante na maggibo nin paagi an gobierno na madangog an sentimyento kan publiko nganing dae na ini maarug sa nangyari sa Indonesia.
Dae niya man pighahale an posibilidad na magkaigwa liwat nin people power sa Pilipinas sa ibong kan mapagal pagkasararuon an mga Pilipino alagad pwedesir matrigger an saindang collective consciousness.
Pigtaram pa kan propesor na pareho ngonian an pigkakahampang kan duwang nacion asin iyo an kadakol na korap na pulitiko na nagti-trigger sa publiko na kalampagon an mga opisina kan gobierno asin ibang mambabatas.
Suhestyon niya man na gibuhon dapat kan gobierno kan Pilipinas asin Indonesia na tawan nin magkakanigong aksyon an demand kan publiko huli ta dapat may mahiling sindang paghiro nganing mapundo an mga nangyayaring katiwalian.
Alagad kun magibo nin aksyon an gobierno asin dae pa man liwat napupugo an korapsyon, dae suboot matatapos an pagkalampag kan namamanwaan sa tunay na paninimbagan asin transparency.
Pagdoon pa ni Rosana na warang ahensya sa gobierno kan Pilipinas man o kan Indonesia na nag-iisip nin long term approach nganing masulusyunan an kahagadan kan namamanwaan.
