LEGAZPI CITY – Nagpahayag nin kamunduan asin pakikisimpatya an alkalde kan Tabaco sa nangyaring aksidente sa syudad na ikinagadan nin anom na persona.
Marurumduman na anom an nagadan makalihis an pagbangga kan sarong ten wheeler truck sa sarong motorsiklo asin pag-araro sa residential area sa lugar.
Marurumduman na gadan an nagmamanehar kan motorsiklo na si Albert Behino na naputol pa an hawak asin gadan man an saiyang misis asin an saindang aki.
Dae man nakasalbar an driver kan truck asin an pahinate kaini kun sain pigtataram na nawaran nin preno an pigmamanehar na truck.
Pighayag man ni Mayor Krisel Lagman na nagpaparahay na sa presente an iba pang bystanders na nadamay sa insidente.
Pinagkokunsiderar man kan alkalde na sarong trahedya an nangyari.
Sa presente nagpapadagos pa man an ipigkokundusir na imbestigasyon kan mga otoridad.
