LEGAZPI CITY- Labi an pagmundo ngunyan kan pamilya kan 40-anyos na sekyu sa sarong mall sa syudad kan Legazpi na nagadan kan Pebrero 12 makalihis na atakehon nin highblood.
Pigbabasol kaini an suboot kapabayaan kan sarong pribadong ospital sa syudad na naghagad muna sainda nin depositong P20,000 antes na bulungon an biktima.
Base sa impormasyon, naka-duty an nasambitan na sekyu kan makamate nin highblood kun kaya naglunad nin tricycle asin nagpa-hatod sa Tanchuling hospital.
Sigon sa ina kaini na si Petronilla Francisco, 61-anyos, makusog pa an saiyang aki kan magpasiring sa ospital alagad nagputok na suboot an ugat huli ta dae tulos na inasikaso kan mga doktor.
Dugang pa kaini, pighahagadan muna kaya sinda nin deposito para sa nagkapirang eksaminasyon.
Inako sana suboot an saiyang aki makalihis na mahiling an insurance ID kaini.
Mawot ngunyan ni Francisco na pa-imbestigaran an ospital na dae man kinumpirmar an alegasyon kan ina kan biktima.
Napag-araman na pitong aki an nawalat kan nagadan na sekyu.
