LEGAZPI CITY-Pigkokonsiderar na matrayumpong lakdang ni 1st District of Albay Representative Congressman Krisel Lagman an pagdeklarar bilang unconstitutional’ kan 2024 General Appropriations Act, huli ta segun saiya haloy nang pigbubusol ini kan taon pang 2024.
Segun saiya, sa eksklusibong intrevista kan Bombo Radyo Legazpi na totoong mapanggana an desisyon kan Korte Suprema huli ta dati nang nagsangat nin petisyon si dating Congressman Edcel Lagman kan taong 2024, makalihis na maipasar ini kan Kongreso an 2024 budget kan taong 2023.
Namalisyahan kaya digdi na mas halangkaw an inaprubahan kan Kongreso sa paagi kan Bicam insertions asin binago kan Bicam sa mas dakulang kantidad poon sa P200-Bilyon pasiring sa P700-Bilyon.
Nagin posisyon man digdi ni dating Congressman Edcel na ‘unconstitutional’ an nasabing dagdag sa pondo, huli ta mas halangkaw an Unprogrammed funds kaysa sa propwestong pondo kan Presidente.
Sinabi pa kan opisyal na kun naaksyunan tulos an nasabing posisyon kan panahon na ito, dakol kuta suboot an nalikayan na mga proyekto na naisingit sa Unprogrammed funds, mantang dae naaraman kun sain napaduman an mga ini.
Sa hiling man niya na napaduman an mga ini sa kontrobersiyal na flood control projects na hasta ngonian padagos na pinag-iimbestigaran.
An mga an Unprogrammed funds, dapat standby funds sana asin napopondohan sana kapag igwang excess na revenue alagad an nangyayari suboot nagigin taguan ini kan ibang proyekto kan ibang mga lehislador asin departamento.
Sinabi man kan opisyal na bako ini magayon na practice alagad huli sa Korte Suprema, mabubuwag na an siring na sistema asin matatawan nin giya an Kongreso sa tamang pagba-budget.
Sa ngonian, hihilingon man kun ano an mga nagastos sa nasabing pondo asin kun posibleng masangatan nin kaso an mismong nag-release kan pondo asin naglaag kaini para sa mga pigtatagong proyekto.
