LEGAZPI CITY— Nadiskubre kan pwersa kan gobyerno an pagibuhan nin improvised explosive device (IED) kan rebeldeng grupong New People’s Army (NPA) sa Brgy. San Antonio, banwaan kan Milagros, Masbate makalihis an engkwentro sa pagultanan kan duwang lado.
Sa intribista kan Bombo Radyo Legazpi ki Southern Luzon Command spokesperson Maj. Gil Perez, nagsasagibo man sana nin security operation an mga soldados kan Semana Santa kan makakua nin impormasyon dapit sa presensya kan mga rebelde sa lugar.
Sa ngunyan, inalerto ni Lt. Col. Redentor Cabanizas, commander kan 2nd Infantry Battalion kan Philippine Army an saiyang mga tauhan siring na man an mga pulis sa posibleng mangyari makalihis na magkaigwa nin ribayan nin putok na nagresulta man sa pagkakadiskubre sa inapod na bomb workshop.
Treinta y tres na pulidong gibo na IEDs na kayang-kayang makadanyar nin 6 by 6 na truck an nakumpiskar sa laog kaini kabale na an PM415 na light vehicles asin pang anti-armor asin anti-personnel na bomba.
Pinag-aadalan ngunyan an content kan ibang materyales.
Mientrastanto, nagluluwas suboot sa assessment kan mga militar na nakatalaan na sabay-sabay na itanom sa Masbate an mga land mines ngani na maipahiling kan NPA na nagtitinir sindang makusog maski bako na ini an totoong nangyayari sa presente.
