LEGAZPI CITY—Piglalaomang magigin dakula an epekto sa sa mga parasisira an paghalangkaw kan presyo kan petrolyo sa tahaw kan nagpapadagos na tensyon sa Middle East.
Segun ki Bureau of Fisheries and Aquatic Resources Albay Provincial Fisheries Officer Alvin Christopher Lat, sa intrevista kan Bombo Radyo Legazpi, kadaklan sa operational cost kan mga ini an nagkokonsumo nin halangkaw na krudo, kaya en kaso maghalangkaw an operational cost sierto na mababawasan an oras o aldaw kan pagsisira ninda sa kadagatan na maresulta sa kadikit na madadakop na sira.
Boot-sabihon kaini na posibleng warang makukuang ganansya sinda alagad mas malulubog pa sa utang.
Suhestiyon man niya na pwedesir munang magin alternatibo kan mga parasisira an farming o iba pang pwedesir na mapagkukuwaan nin ganansya.
Nagpapadagos man an saindang validation para sa mga nag-apply nganing mag-aprobitsar sa fuel cards na nagkakantidad nin P3,000.
Mientrastanto, mensahe man kan opisyal na pwedesir na maghagad nin tabang sa ibang ahensya kan gobierno en kaso na kulang an puhunan sa pagsisira nganing maski papano mabawasan an saindang kadifisilan pigkakahampang.
