Paggamit sa ‘Bersamin files’ bilang ebidensya, tinabla sa Kamara

Ipigdoon ni House Public Accounts Chairperson asin Bicol Saro Party-list Rep. Terry Ridon na wara nin gabat o “evidentiary value” an mga naglalakop na dokumento na bisto bilang “Bersamin files” na nagkokonektar ki Presidente Ferdinand Marcos Jr. sa mga iregularidad sa pagpondo.

Sa sarong pahayag, sinabi ni Ridon na sagkod na dae pa makumpirmar ni dating Undersecretary Adrian Bersamin an authenticity kan mga nasabing mensahe, magtetenir ining “triple and double hearsay.”

An pahayag kan mambabatas bilang kasimbagan sa mga alegasyon na nagruluwasan manungod sa suboot pagriribayan nin mensahe sa pagultanan ni Bersamin asin kan Presidente manungod sa kickbacks sa flood control projects.

Segun ki Ridon, dapat magtaram si Bersamin ngani na malinaw kun totoo o gibo-gibo sana an mga nasabing komunikasyon.

Pigdoon niya na an mga dokumento dai dapat ikonsidera na “actionable information” kan arin man na investigative body afuera sana kun igwa nin malinaw na basehan an pinagpunan kaini.

Magigirumduman na enot nang pinahimutikan kan Malacañang an mga nasabing akusasyon asin inapod ining daing basehan mantang wara pa nin solidong ebidensya na ipigpresentar.