VC of pageant enthusiast in Albay re: Miss Phil Maxine Medina
LEGAZPI CITY- Positibo an nagkapirang pageant enthusiasts sa Albay na maiuuli ni Maxine Medina an korona para sa prestihiyosong Miss Universe 2016.
Sigon sa sarong myembro kan LGBT community, nagtutubod syang magigin successor si Maxine ni reigning Miss Universe Pia Wurtzbach.
Posible suboot na magkaigwa nin back-to-back win an Pilipinas huli ta igwa nin “wow factor” an kandidata na ipinahiling kaini sa preliminary competition asin pwedesir pang magpangalas sa mismong coronation maski nakakaresibe nin dakol na kritisismo asin pangba-bash.
Kan mahapot man ini dapit sa planong paggamit nin interpreter ni Maxine, ibinase nya an saiyang opinyon sa nagin simbag ni 2012 Miss Universe 1st runner-up Janine Tugonon sa Question and Answer portion kun sain sinabi kaini na dae man importante na tatao mag-Ingles an manggagana kan korona, alagad hasta sa naipapahayag kaini an sadiri, maski siisay pwedesir na magin Miss Universe.
Sigon pa sa pageant enthusiast, dae man hihilingon sa pageant kun gurano kahirarom an Ingles alagad kun ano an mismong laman kaini.
Mientrastanto, kan papilion kan saiyang napipisil na top 5 sa Miss U, sinabi kaini na an Spain, Venezuela, USA, Philippines asin Colombia an mapipili kan mga judges.
Ngunyan, hagad kaini sa mga parehong Pilipino na suportaran na sana si Maxine sa saiyang magigin performance sa coronation sa aga.
Maski ano suboot an magin resulta kan kompetisyon, proud man giraray sinda sa 26-anyos na model kasabay kan saindang kumpyasang deserving ining magsulot kan korona.
