LEGAZPI CITY – Nahihiling kan sarong political analyst na sarong pagtanggap sa kritisismo kan mga kaalyado an ginibong pagdemitir ni Senate President Pro Tempore Ping Lacson bilang chairman kan Senate Blue Ribbon Committee na nag-iimbestiga sa suboot korapsyon sa flood control projects.
Segun ki Bicol University-Political Science Department and Far Eastern University Prof. Amr Solon Sison sa intrevista kan Bombo Radyo Legazpi na posible man na magserbi an resignation ni Lacson sa naunambitang komite nganing matanggal na man an mga pagdududa kan ibang senador na pigtatakpan kan saiyang liderato an ibang indibidwal o grupo sa imbestigasyon na pigkokondusir.
Pagdoon niya man na madepende na sa kun sisay an mapalit saiya kun magkakaigwa pa liwat nin pagdududa sa imbestigasyon kan komite mapadapit sa mga katiwalian sa proyekto kan gobyerno alagad mas maray na suboot kun ipapaubaya na sana sa independent commission an pagkapot sa pag-iimbestiga.
Kun siya an hahaputon, may potential sinda Senator Francis “Kiko” Pangilinan asin si Senator Risa Hontiveros na pumalit bilang chairman kan komite alagad kun mapadapit sa pagkapot kan imbestigasyon an nagsasayang sana suboot sinda nin oras huli ta igwa nang independent commission.
Pigtaram pa kan naunambitang political analyst na importante an Senate Blue Ribbon Committee sa fact-finding asin pagbuyagyag kan mga nangyayaring korapsyon sa gobierno nganing magin epektibo an ipigpapa-otob na mga ordinansa asin ley sa gobierno.
Punto pa ni Sison na an problema sa mga committee hearings poon kan impeachment ni dating Presidente Erap Estrada sagkod ngonian an nagigin political grandstanding na sana kun sain nagagamit na sana sa pagpapalakop nin information manipulation.
