LEGAZPI CITY — Pigtutubudang haloy pa an peryodong aabuton kan impeachment proceeding kun ikukumparar sa pagluluwas kan desisyon sa paagi kan quo warranto petition na ipigbubusol ni Solicitor General Jose Calida.
Sa intrevista kan Bombo Radyo Legazpi ki Ako Bicol Partylist Representative Alfredo Garbin Jr., posibleng magluwas na nin resulta an Korte Suprema sa maabot na Hunyo o Hulyo mientras na Hulyo pa piglalaomang makakabot sa Senado an ididiskutir pa sanang articles of impeachment sa Kamara.
Dugang pa ni Garbin na pighihiling na makalihis pa kan State of the Nation Address (SONA) ni Presidente Rodrigo Duterte an pinakaamay nang pagconvene kan upper chamber para digdi.
Mientras tanto, nagtutubod an nasabing kongresista na magigin marikas man an pagconvene kun mamawoton kan presidente na maihahabol ngonian na Mayo alagad nagpagirumdom pa si Garbin na duwang semana na sana antes an sine die adjournment o pagtatapos kan ikaduwang sa regular session sa Mayo 31.
Dugang pang nagkapira sa mga senador an nagpahayag na habo magkaigwa nin pagdangog durante kan recess sa Kongreso.
