LEGAZPI CITY-Nagtutubod an kampo ni Bise Presidente Sara Duterte na posibleng pahalipoton an impeachment trial kun tuluyang ibabasura o babawion kan prosecution panel an Article 3, na nagtutukar kan mga alegasyon nin suhol o kickbacks laban sa mga opisyales kan Department of Education.
Segun kay Defense Deputy Spokesperson Atty. Justin Nicol Gular, pighahalat pa kan saindang lado an pinal na desisyon kan piskalya kun babawion, imamantinir, o ipapadagos an nasabing orden antes sinda magpaluwas nin dugang na opisyal na pahayag.
Nanindugan si Gular na irerespeto kan depensa an anuman na desisyon kan piskalya asin preparado sindang i-adjust an legal na preparasyon basado sa maluwas na desisyon.
Apwera kaini, bukas man suboot an kampo kan Bise Presidente sa mga propwestong stipulation hale sa prosecution panel. Alagad, kaipuhan nguna nindang repasohon asin pag-adalan nin maingat an mga probisyon kaini bago itao an saindang opisyal na simbag.
Inasegurar man kan legal team na preparado sinda para sa mas halawig na trial sessions, kabali an bilog na aldaw na hearing, ngani na makasabay sa piglalaoman na calendar asin schedule kan Senado.
Tinawan duon ni Gular na kabale sa saindang bilog na pag-hahanda, bako sana sa legal na mga bagay asin dokumento, kundi pati na sa pisikal asin mental na angat nin halawig na paglilitis.
