Nag-arangkada na ngunian na aldaw, Agosto 13, an pag-urulay sa panukalang pambansang pondo para sa 2025 sa paagi kan briefing kan Development Budget Coordination Committee (DBCC).
Pinangenotan ni Senate Committee on Finance Chairman Senadora Grace Poe an diskusyon sa panukalang P6.352 trillion national budget para sa masunod na taon.
Present sa DBCC briefing an mga opisyal gikan sa Department of Budget and Management, Department of Finance, National Economic and Development Authority, Office of the President, asin Bangko Sentral ng Pilipinas.
Pigsabi ni Senadora Poe na saindang sisiertuhon an transparency, accountability, asin prudent o makatwirang paggamit kan resources kan gobyerno.
Enot nang ipig-anunsyar ni Poe na an pagbusisi sa proposed national budget an aabuton sagkod Oktubre 18.
Segun sa saiya, plano nindang isumetir an committee report kan 2025 national budget asin maaprubaran ni Presidente Ferdinand Marcos Jr sa enot na seman kan Disyembre.
Enot nang pigsierto ni Senate President Francis “Chiz” Escudero na sulamenteng an mga ahensya lang na nangangaipo nin confidential asin intelligence funds an tatawan kaini.
Huli sa election budget an bubusision na pondo, sisiertuhon man suboot ninda na dae ini magagamit sa kampanya kan mga kandidato.
May batas asin Comelec regulation na man suboot an nakalatag para maibitaran na magamit an pondo kan gobyerno sa kampanya kan siisay man na kandidato.
