Ipigbubusol kan Senate Committee on Social Justice, Welfare, and Rural Development an mahiwasang reporma sa pagbabarewas kan ayuda kan gobyerno, kabale an pagbawas sa mga dokumentong pighahagad asin pagharang sa pakikiaram kan mga pulitiko sa proseso.
Sa pagdangog kan komite, sinabi ni Chairperson Senador Erwin Tulfo na obheto kan proipwestong ley na gibuhong permanente an Assistance to Individuals in Crisis Situation (AICS) kan Department of Social Welfare and Development (DSWD), asin sabay na pasimplehon an paagi kan pagkuwa nin tabang.
Sa irarom kan propwesto, duwang pangenot na dokumento na sana an kakailpuhanon kan mga benepisyaryo, partikular sa medical assistance asin iyo ini an sarong valid ID asin magkakanigong hospital bill o medical record.
Target kaining tanggalon an mga requirement arug kan Certificate of Indigency, barangay clearance, notarized affidavit, Social Case Study Report, asin magin marriage certificate sa pirang klase nin tabang.
Segun sa senador, an presenteng sistema an bako sana mabantol kundi nagigin dalan man sa pamumulitika, huli ta napipiritang mag-agi an mga nangangaipuhan sa barangay para sa indigency certificate na sarong dokumentong kalimitan an may pangaran asin ladawan kan mga lokal na opisyal.
Pigtaram kan komite na an sistemang ini nagbubugtak sa mga benepisyaryo sa peligro, orog na sa mga panahon nin eleksyon, kun an pagdistribwir kan tabang pinansyal nagigin sensitibo.
Kinumpirmar kan DSWD na sa oras na maisa-ley an bill, plano kaining i-elevate an AICS bilang separadong bureau nganing mapakarhay an pamamahala, staffing, asin implementasyon kan programa sa bilog na nasyon.
Kasabay kaini, nangapudan si Tulfo sa Department of the Interior and Local Government (DILG) na padalion an mahigot na implementasyon kan mga polisiya na nagbabawal sa presensya kan mga pulitiko sa distribusyon kan ayuda, susog sa 2026 General Appropriations Act.
Mientrastanto, bilang kasimbagan, nagpaluwas an DILG kan Memorandum Circular No. 2026-066 na malinaw na ipinagbabawal an pagbugtak nin mga pangaran, ladawan, o anuman na pagbisto sa mga opisyales kan gobierno sa mga programa na pinondohan kan gobyerno nasyonal.
