LEGAZPI CITY — Ikinaugma kan representante hale sa World Health Organization (WHO) an pagpasiring kaini sa Bicol ngane na ipaabot an maray na lakdang sa pag-preventar kan dengue.
Saro si Dr. Gundo Weiler sa nag-atendir sa 7th ASEAN (Association of Southeast Asian Nations) Dengue Day celebration kun saen sinabi kaining dakula na isyu an dengue na naglalakop na ngunyan sa haros 100 na nasyun sa kinaban.
Nairehistro man an mas dakol na kaso sa Pilipinas alagad maugma suboot sinda huli sa piggigibong lakdang kan DOH ngane na masolusyunan an problema.
Naglatag naman nin istratehiya para sa rehiyon siring man sa Pilipinas kun saen target nindang bawasan nin 50% an death rate kan dengue pag-abot kan taong 2020.
Mauutob sana suboot ini kun ia-apply an bagong approach, techniques asin gagamiton an teknolohiya ngane na dae na maipalakop pa an virus.
Gabos suboot na namamanwa an may kayang ikontribuir sa dengue prevention siring na sana kan paghali kan breeding sites kan mga lamok.
Sa paagi kaini, padiit-diit na mai-eliminate an virus asin mababawasan an magiging biktima kan dengue.
